Vawiin ni 21 May, 2018 (Thawhtanni) hian MZP Conference Hall-ah Zo Re-Unification Organisation din champhaphak vawi 30-na hun hman a ni a. He hun hi Pu R. Lalchhuanan kaihruaiin, Maj. C. Thanhrangan hunserh a hmang a, Pu F. Lalruatliana General Secretary (organisation) in ZORO lo din chhoh dan report a pek bakah ZORO hruaitu hlui boral ta te sunna hun hman a ni bawk.
ZORO President Pu R.Sangkawia’n thu sawiin, “Zofate hian kan dinkhawchhuah na atan leh khawvel hriat tham ni turin kan insuihkhawm a ngai a, kan dikna chanvo hi keimahni zofaten kan sualchhuah a ngai a, kan tanho deuh deuh a ngai a ni” a ti a. "United nation declaration on the rights of indigenous peoples (UNDRIP) in kan dikna chanvo min pek hi a tak a kan hman tangkai deuh deuh pawh hi keini ram leilungfa te tan a pawimawh hle a ni” tih a sawi.
Kalkhawm te hian, _“Zofate kan in zawmkhawm a rorel na pakhat hnuaia kan awm leh theihna tura ZORO hruaitute hmalakna hi kan ring tawk a. India sawrkar pawhin UNDRIP thlawpa UNO a ban a lo phar tawh angin, UNDRIP a nihna ang taka a lo puitlin theih nan India rorelna sang Parliament-ah a adopt ngei kan phut tlat a ni”_ tiin resolution a siam.
Zo Reunification Organisation (ZORO) hi First World Zo Convention, Champhai a neih ni 20 May 1988 khan Khawvel hmun hrang hrang atanga palai kalkhawm ten Zofa thendarh a awm tawhte kan insuihkhawm leh theih nan din a ni. A tirah ZORO hi Political wing ang a kalpui ni mahse, Second World Zo Convention 1991 in a rel angin ZORO chu NGO anga kalpui a ni ta a. Zofate dikna chanvo humhalh a nih theih nan leh kan insuihkhawm theih nan hma a la mek zel a, kumtin UNO hnuaia Expert Mechanism on the rights of Indigenous Peoples (EMRIP) leh United Nation Permanent Forum on the Rights of Indigenous Peoples (UNPFII) session-ah a tel ziah a ni. Tunah ZORO hian Mizoram state chhung leh pawnah Branch, Division leh Zonal engemaw zah a nei mek a ni.
Sd/-
(CHINKHANMANGA)
General Secretary
I/c (Publicity)
No comments:
Post a Comment