ZORO TOBUL

Kum 1968-a MNF leh India sawrkar inremnaah India ram bung dang ten an neih ang bawk, India state zinga awm ve tura inremna neih a lo nih tak hnu pawh khan, Zofate dinchhuah leh a, hnam kan nih thinna pangngaia thawhlehna tur thu chuan mi thinlung a luah reng a; chuvangin:

Brig. T Sailo (L)
Founder Chairman

1. 1988 May 19-21 chuan, Mizoram People's Conference (P.C) Party leh Manipur lama Zomi National Congress (ZNC) tangrual chuan, Convention  champhaiah neiin, Zoram hmun hrang hrang- Chin Hills, Arakan, Chittagong Hill Tracts, Tripura tlangram, Manipur, N.C. Hills leh Mizoram a\angin palai an kal khawm a ni. Palai kalkhawmte chuan chipchiar taka an sawi ho hnuah ‘Zo’ tih chu kan hnam pumpui kohna atan an pawm tlang a. Zofate British-ten an thendarh, anmahni ngei pawhin a dik lo tih hriaa, rorelna pakhat hnuaia dah leh tura an thu rolum, 1892-a siam zaizuiin, rorelna pakhat hnuaia awm leh tura hma la thar tur Pawl din thar lehin, Zo Reunification Organisation, a lo piang ta a. Chuta hruaitute chu hengte hi an ni:- 

Chairman                 -  Brig. T. Sailo, 

Vice Chairman         - Pu T. Gougin leh 

                                    Pu C.Chawngkunga 

Treasurer                 - Pu R.Thangmawia, 

Secretary General   -  Pu Thangkhangin Ngaihte leh

                                    Pu Lalhmingthanga

‘Chhinlung chhuak Zofate kan ni’ tih Inremna Thuthlung an ziak a, hruaitu za chuangin hming ziakin an nemnghet.

Pu R.Thangmawia (L)
Ex President

2. 2nd World Zo Convention chu July 17, 1991-ah Vanapa Hall, Aizawlah koh a ni a, Zoram hmun hrang hrang atanga palai kalkhawmte chuan ZORO chu Local Political Party (P.C. Party) atangin a la chhuak ta a. Hruaitu, Local Politics a awm zel duhte Brig. T. Sailo, Chairman, Pu C. Chawngkunga Vice Chairman, Pu Lalhmingthanga Secretary General te chu P.C. Party-a awm zuiin hruaitu thar atana thlante chuan party-a a ni nihna chhuahsanin, ZORO chu Non-Governmental Organisation(NGO)-ah leh a ni ta a ni. Chuta hruaitu tharte chu:-

President                 - Pu R. Thangmawia, 

Dir. General-ZRV   - Pu Tlangchhunga, 

Treasurer               - Pu Zalianchhunga, 

Secretary General  - Pu H. Thanglawra 

Consultant              - Capt. L.Z. Sailo

A thil tum pawh “Zofa then darha awm tawhte insuihkhawm leh a, rorelna pakhat hnuaia awm, Chin-Lushai Conference 1892 Thurolum dung zuiin” tih a lo ni ta a ni.

Tichuan khawvel hruaitu lian te leh UNO thlenga Memorundum thawnin, UNO-in hnam tenau leh tualto hmante tana chanvo a siamte chang ve thei turin, chutiang buatsaihna, UNO-in inkhawm (Session) a siamah te, 1999 atanga tel ve tanin, 2007-a UNO-in Tualto hmante tana Dan thar a siam, United Nations Declaration on the Rights of Indigenous Peoples (UNDRIP) dung zuia hma la ve thei turte zingah, ZO INDIGENOUS PEOPLE (ZO PIs) tiin, Zo hnam chu hriat kan lo ni ve ta a ni.