ZORO PRESIDENT IN TRIBAL MARTYR HRIATRENGNA LUNGPHUN HAWNG

Manipur state assembly-in tribal-te nekchepna tur dan a pass dodal avanga nunna chânte hriatrengna chu vawiin khan Brigadier General R.Sangkawia, President, Zo Reunification Organisation (ZORO) chuan Lamka, Manipur-ah a hawng.

Photo: Zogam.com

He hunah hian thu sawiin R.Sangkawia chuan sorkar hrang hrang hnuaia awm mek Zofate hi eng tikah emaw chuan Pathianin a la hruai khawm ngei ang tih a ring a, “Chu hun chu nghakhlel takin kan thlir mek a ni,” a ti a. “Nang leh kei hian kan ring ngam lo a nih pawhin Pathian hian a tum chu a tihlawhtling ngei ngei dawn a, Zoram tharah hian min then kai ngei dawn a,” ZORO president chuan a ti bawk.

Tun hma lamin rorelna hrang hrang hnuaia awm Zofate rorelna pakhat hnuai dah tumna a lo awm tawh thin a; mahse, “Kan Pathian tum dan a nih miau lo va; chuvangin, khang ruahmanna ropui takte kha a puitling lo a ni mai,” ZORO president chuan a ti. Khang ruahmanna te kha lo hlawhtling chu ni se khawvel hmun hrang hranga Zofate a huam kim dawn lo niin a sawi.

Pakistan atanga East Pakistan a independent rual khan Chittagong Hill Tracts chu Mizoram behtir tura ruahmanna a awm a; MNF leh India sorkar inrem hnuah pawh Rajiv Gandhi, India prime minister a nih laiin India hmarchhaka Zofate awmna chin ram zawng state pakhata siam tumna a awm leh niin ZORO president chuan a sawi bawk.

Khawvel puma Zofate hi rorelna pakhat hnuaia Pathianin a tum nia a ngaih chhan ZORO president chuan a sawi a. Hmun hrang hranga awm Zofate hi hming hrang hrang Chin, Kuki leh Lushai tia hriat an ni țhin a; Zofate inkarah pawh buaina leh neuh neuh a lo awm tawh țhin mah se mihring rin phak piah lamah unau nihna tilang tur thil tunhnaiah hian a lo thleng a ni, a ti.

August 31, 2015 Manipur state Legislative Assembly-in bill pathum, Anti-Tribal Bill tia sawi zui takte a pass a, he bill hi hman a nih chuan Manipur state-a awm mek Zofa tam tak chu Manipur mi an ni thei tawh lo ang a, sumdawnna lamah thlengin harsatna an tawk dawn a; tin, hnam lian zawk Meitei-te hian tribal ram chhunga hmun leh ram an nei ve thei dawn a ni. Hei hian a nghawng nasa ber tur chu Zofate a ni a. Chu dan duh lohna lantirnaah Zofa mi pakuain nunna an chan a ni. Kum 2016 khan Chin state, Myanmar chu tuilianin nasa takin a tichhia a, chu chuan Zofate inunauna a ti tho leh niin ZORO president chuan a sawi bawk.

Manipur-a Zofate chuan Joint Action Committee Against Anti-Tribal Bills an din a, chu committee chuan Zofate khawpui Lamka khaw sira Mata Dam bulah Tribal Martyrs Memorial Park an siam a, chu hmunah chuan Tribal Martyrs Memorial siam lehin nimin khan ZORO President chuan a hawng a ni.

(Report: LUNGLEN BUREAU Aizawl, August 31, 2018)